العسكرى ........ والكلب ....... ....... اااااااه يا ولاد الكلب

مش عارف ليه فجأة افتكرت الحكاية دى مع انى نسيتها من فترة ... جايز كل ما افكر فى اللى بيحصل فى البلد افتكر حكاية العسكرى الغلبان ده ...... والحكاية يا سادة بدأت كالتالى

فى معسكر من معسكرات الأمن المركزى فى الصعيد كان العسكرى الغلبان بيأدى الخدمة العسكرية وكان من ضمن الحاجات المكلف بيها أنه يدخل الفطار كل يوم الصبح لكلب من الكلاب البوليسية .... والفطاره ده يا محترمين عبارة عن 8 بيضات وكوباية لبن ورغيف عيش ( أيوه فطار الكلب والله ) واخونا العسكرى الغلبان اللى أصلا مفطرش وهو بيدخل الفطار للكلب كان جعان وبسرعة جات فى دماغه فكرة جهنمية .... العسكرى قال فى عقل باله يعنى كلب ويفطر بده كله وانا بنى أدم مبفطرش أصلا فيها إيه لو أخدت بيضه من الـ 8 اللى بيطفحهم الكلب ابن الكلب على الصبح يعنى هو هايعرف ولا كان هايعدهم كام واحده ... وعنها واخونا العسكرى راح اخد بيضه من فطار الكلب وأكلها

وعنها يا معلم والكلب أبن الكلب حلف براس أبوه ما ياكل ولا يفطر العسكرى احتاس يعمل إيه فى المصيبة اللى حلت على راسه دى ........ المهم فى خلال نص ساعه المعسكر اتقلب علشان الكلب البوليسى مش راضى يفطر وعنها وطلعت إشاعة ان الكلب مضرب عن الأكل والموضوع كبر قووووووووى وكل الظباط اللى فى المعسكر احتاروا فى حكاية الكلب اللى مش راضى يفطر ولدرجة إن الموضوع وصل لمدير الأمن ..

والسيد مدير الأمن أرسل للمعسكر السيد العميد الطبيب بيطرى علشان يشوف ايه اللى أصاب المحروس الكلب البوليسى وخلاه يضرب عن الأكل ودخل سيادة العميد البيطار على الكلب وبص للفطار وعنها وراح مدور وشه على الظباط والعساكر اللى واقفين وقالهم ممكن تكونوا انتوا بهايم ومبتفهموش لكن الكلب ده بيفهم ... مين الحيوان اللى دخل الفطار للكلب .. راحوا شاوروله على العسكرى الغلبان .. راح العميد قالهم الفطار بتاع الكلب 8 بيضات ودول 7 بس البيضة التامنه راحت فين وعنها وراح شاخط فى العسكرى الغلبان اللى اتخض واعترف انه هوه اللى أكلها ... أتارى الكلب ابن الكلب البوليسى عارف ان الفطار بتاعه 8 بيضات ولما شافهم 7 بس مرضيش يفطر ابن اللئيمه وحلف براس ابوه ماهو هايفطر ولا يشوف فطار غير لما يجيبوله البيضة الـ 8 .................... شوفتوا الكلاب اللى بتفهم واللى بتدافع عن حقها

المهم علشان ما أطولش عليكم اخونا العسكرى الغلبان تم احالته لمحكمة الشرطة واتحكم عليه بالحبس لمدة 6 شهور .. وطبعا اللى دخل الجيش هايعرف معنى الحبس 6 شهور يعنى غير الحبس والبهدلة العسكرى هايفقد دفعه يعنى مش كفاية انه امن مركزى يعنى هايقضى 3 سنين و3 شهور لاااااء ..... ده كمان هايفقد دفعة يعنى 6 شهور زيادة على مدة خدمته بسبب كلب

هوه ده اللى حصل وأقسم بالله انى سمعت هذه الحكاية من العسكرى واصدقائه العساكر الحاضرين معه داخل محكمة الشرطة بإحدى مدن الصعيد وعلشان متفتكروش ان محكمة الشرطة دى فيها قضاة عاديين وقانون وإجراءات لاااااا دول ظباط شرطة لكن بيشتغلوا قضاة والحكم بيصدر على المتهمين بالأمر المباشر عن طريق التليفون من مدير الأمن يعنى حاجة كدة خاصة بالشرطة

عموما هيا دى مصر يا عبله ... مصر اللى العسكرى الغلبان بيتحاكم ويتسجن ويطلع عين اهله علشان اخد البيضة بتاعة الكلب .. الكلب اللى بيفطر فطار عمر العسكرى الغلبان ما شافه . وناس بتسرق وتنهب بالملايين والمليارات ومحدش بيعملها أى حاجة ...... يعنى حتى الكلاب ليها قيمة فى البلد دى عن البنى أدمين ..

والله اعلم أيه هايكون اخرة اللى بيحصل فيكى يا مصر إيه