شحات .... بقولك شحاااات

من زمان وانا من اكتر الحاجات اللى ممكن تحرق دمى انى الاقى واحد شحط طويل عريض ممكن يوقع حيطه بكتفه الاقيه واقف بيشحت او بيطلب صدقة من اى حد ... حاجة تنرفز طيب ياعم ما تروح تشوفلك شغلانه بدل قلة القيمة دى
ومرة وانا صغير يمكن حوالى 17 او 18 سنه لقيت واحد بالمواصفات دى شباب طول بعرض تحس انه وحش وقفنى وقالى ممكن تساعدنى يا بيه ( قال انا بيه قال ) قلتله خير ياعمنا ( افتكرته تايه وبيسأل على مكان ) قال اى مساعده منك اصل انا ظروفى وحكايتى قلتله ده انت اللى بيه ياعم الحاج لو تقدر انت تساعدنى معنديش مانع ومن ساعتها وانا انطبعت فى بالى فكرة سيئه عن الناس اللى ربنا مديها صحة وشباب ولمؤخذة بتتسول وبقى عندى منهم حساسية لما اشوف الواحد من دول تلاقى العقاريت بتتنطط فى وشى والفكرة دى هيا السبب فى الموقف اللى هاقولهلكم

فى يوم من ذات أيام الصيف شديد الحرارة والوقت وقت عصرية والواحد قاعد مأنتخ تحت المروحة ( مكنتش التكييفات انتشرت زمان كده ) لقيت جرس الباب بيضرب قلت خير اللهم اجعله خير
بفتح الباب لقيت واحد طوووويل وعريض حاجة كده تخض تحس فيه بالهيبة
هو : السلام عليكم
انا : وعليكم السلام اتفضل
هو : الحاج موجو ـ قصده والدى
انا : ايوه حضرتك مين
هو : قوله شحات
انا : اممم روح ياعم الله يسهلك روح
ورحت قافل الباب ومفيش دقيقه ولقيت جرس الباب بيضرب تانى فتح لقيت نفس الراجل هوه هوه
انا : خير يا عم الحج فيه ايه تانى
هو : لو سمحت قول لوالد شحات عاوزك
انا : بس والدى نايم دلوقتى
هو : طيب صحية وقوله شحات عاوزك
انا : اصحيه ليه هو انت شحاااات من الأمم المتحدة ولا من مجلس الأمن يالا ياعم الحج من هنا الله يسهلك
هو : هههههههههه حلوه ... يا أبنى روح صحيه كده عيب
انا : بقولك ايه يالا ياعم اتكل بقى الدنيا حر ومتخلنيش اتغابى عليك وانت راجل كبير
هو : يا ابنى انت فاكرنى أيه بس
انا : فاكرك أيه يعنى هاتكون رائد فضاء وانا مش واخد بالى
هو : يا أبنى انا عمك شحات صاحب والدك وعاوزه فى موضوع مهم !!!! .2
يا نهااااااااااااااار اسود على اللى هايحصلى ـ يا أرض اتشقى وابلعينى ـ يا منظرى الزبالة
انا : أنا أسف ياعم شحات والله مش واخد باللى اصل انا اول مرة اقابل حضرتك معلش سامحنى اتفضل اتفضل ياعم الحاج وعنها ودخلت الراجل الصالون ورحت اقول للسيد الوالد
بعد ما الراجل مشى لقيت السيد الوالد بيندهلى بعلو صوته

إيه اللى عملته مع الراجل ده يا ابن الكلب يا حمار
انا : بس متقولش حمااار ....... نياهاهاهاهاهاها